• ثلاثة أسئلة لابد من الإجابة عليها قبل عملية التسويق لأى منتج

لما بتبدأ تنفذ عملية التسويق على ( القنوات الخاصة بالديجتال ) بشكل خاص فإنت محتاج لخطة وفيه نماذج كثيرة لعمل الخطط اللى بتساعدك على تنظيم أفكارك وخطوات التسويق اللى هتمشى عليها والاعلانات اللى هتعملها وازاى هتقيس نتائجها والتارجت اللى إنت عايز تحققه وتوصل له  .. فيه خطوات سريعة ممكن تقوم بيها وفى نفس الوقت هتحسن من آداء عملية التسويق المباشرة ( الإعلانات ) اللى هتقوم بيها .. بس فى العموم فيه أسئلة مهمة لازم تراعيها فى أى خطة تسويقية هتعملها سواء بشكل مفصل أو خطة " عمل " سريعة على " السوشيال ميديا "

وبتتلخص فى 3 أسئلة مباشرة .. وهم :

• أنا بسوق إيه بالضبط ؟

وإنت أكيد هتقولى ما ده سؤال بديهى ! يعنى أنا عطشان أكيد هشرب ! .. فأكيد انا عارف أنا بسوق لإيه مش أول مرة أتعرف عليه !

هقولك لاء .. ممكن متبقاش عارفه .. أيوه إنت عارف شكل المنتج وتفاصيله وأسعاره ! وتفاصيل تانية .. بس ممكن متبقاش عارف هو بيستخدم فى إيه تحديدا .. ممكن متبقاش مدرك لكافة مميزاته وإستخداماته المختلفة .. وممكن متبقاش عارف إيه عيوبه كمان ودى اللى هتأثر على رد فعل الناس عليه وبيبقى فيه إجابات لازم تحضرها علشان أسئلة العيوب قبل المميزات !

فمحتاج تعمل بحث أكثر عن المنتج الخاص بيك والمنتجات الشبيهة والمنافسين ورأى السوق والعملاء وتجاربهم معاه هو نفسه أو منتجات أخرى بحيث تكون عارف إنت بتسوق إيه وهتسوق له إزاى وهتتكلم عنه بأى شكل

• المنتج ده هيروح لمين ومين محتاجه ؟

السؤال ده له مكانة خاصة .. لأنك لازم تدرس وتحدد مين الشريحة أو الشرائح اللى انت بتستهدفها فى بيع منتجك .. الناس دى هما مين ؟ أعمارهم ؟ شريحتهم الإجتماعية ؟ أماكن تجمعاتهم ؟ سلوكهم الشرائى والحياتى ؟ ايه مشاكلهم وايه إحتياجاتهم ؟ ليه عايزين منتجك ؟ ليه منتجك هيبقى أفضل لهم ؟ مين فيهم محتاجه أكثر ومين صاحب قرار الشراء ؟ هتخاطب كل الشرائح مرة واحدة ولا هتركز على شريحة أو إثنين ؟ هتبيع كل منتجاتك فى نفس الكامبين ولا منتج رئيسى انت عارف انه هيشدهم انهم يشوفوا باقى منتجاتك ( لو عندك أكثر من منتج لنفس الشريحة ) ؟

كل ده أسئلة لازم تجاوب عليها بإنك : تعرف – تدرس – تبحث – تدور عن .. انت بتسوق لمين ومين اللى محتاج منتجك ده !

• إزاى هسوق له صح وفين ؟

وهنا السؤال ده هيبقى مكمل لعملية البحث السابقة ! .. لأن علشان توظف ميزانية ومجهود التسويق وألية الإعلانات والدعاية ومتخسرش وترمى فلوسك فى الأرض فلازم تعرف جمهورك ده فين ؟ بيقضى أطول وقت على إيه ( ديجتال أو أوفلاين )

ياترى أفضل وأكبر منصة " تواصل " بيبقوا عليها هى مين ؟ إنستجرام ولا فيسبوك ؟ ونسبتهم فى كل قناة منهم .. ومين أفضل قناة فيهم بييجى منها " تفاعل " له عائد على الشراء منك أو التفاعل مع منتجاتك بشكل مباشر وهتخدمك فى التارجت الخاص بيك من المبيعات مثلا أو على حسب إنت عايز توصل لإيه

طيب هل هعلن بس " أونلاين " ولا ممكن كمان أعمل إعلانات على اللوحات الإعلانية أو فى أماكن معينة ( نوادى – صالات – أماكن عامة .. إلخ ) بالتعاون مع الجهات المسئولة عن الأماكن دى ؟

كل دى أسئلة مهم جدا تحددها وتعرف إجابتها كويسة . علشان تقدر تخدم عملية التسويق الخاص بيك بشكل سليم وتحقق منها نتائج واضحة ومترميش فلوسك فى الأرض وتضيع وقتك ومجهودك