نقاط مهمة جدا لازم تراعيها فى عمل إعلاناتك على الفيسبوك
جزء أساسى من عملية البيع أون لاين هى الإعلانات .. والإعلانات إما إنك بتعملها بنفسك أو إنك تشوف شخص او شركة تعملها ليك
وأوقات بتحتاج علشان توفر التكلفة إنك تعمل إعلاناتك بنفسك
وعلى قدر ما الموضوع مش سهل بس هو مش صعب برضه زى ما شركات أو متخصصى " الإعلانات " بيصوروا ليك .. الموضوع هيبقى كويس معاك بالتجربة والممارسة والـ Test المستمر
خاصة انك بتعمل اعلانات لمجالك إنت فهتبقى مع الممارسة والتعلم المستمر متخصص فيه أكثر وفى التارجت اللى بتعمله وكمان شكل الإعلانات اللى هتنفذها
ومع الوقت كمان هتعرف إن العبرة مش بالأرقام فقط وإنما فيه معايير كتيرة بيتحكموا او بيفرقوا مع نتائج الإعلانات الخاصة بيك
فى شركات وأشخاص بيسوقوا لنفسهم إنه بـ 100 جنيه هيوصلك لـ مليون شخص .. و بـ 500 جنيه هتعمل ساندويتشات لانشون ببلاش وهيوصل إعلانك كمان لـ 10 مليون شخص وأرقام كتيرة بس العبرة مش بالرقم .. العبرة بالأسباب اللى هنتكلم فيها دلوقتى وهى :
وقبل ما نذكر الأسباب لازم نذكر أهم معامل فى المعادلة دى
جمهورك ! .. إنت بتكلم مين وبتستهدف مين وهما بيتفاعلوا ازاى ؟ بيستجيبوا لإيه بالضبط ؟
فلازم تعمل بحث محترم وبتفاصيل مش دقيقة أوى بس على الأقل تفهم السلوك الخاص بجمهورك على الإنترنت وده هينعكس على كل اللى جاى دلوقتى
أولا : المحتوى الخاص بالاعلان :
المحتوى المكتوب اللى بنتكلم عنه هنا .. البوست أو الإعلان اللى إنت بتعمله .. أو حتى الفيديو اللى انت هتستخدمه فى رسالتك لازم تكون عارف كويس وانت بتشتغل فيه الإجابة على الأسئلة دى :
- بيبدأ إزاى ؟ بيتكلم عن إيه ؟ بيناقش ايه ؟
- بيوجه كلامه لمين ؟ وهل التوجيه ده صح ولا لاء ؟
- هل المحتوى هيشد ولا لاء ؟
- هل المحتوى فعلا مناسب وصحيح للفئة والجمهور اللى بتستهدفه ؟
- هل هو طويل بشكل يتناسب مع طبيعة الحاجة اللى بتسوق لها ؟
- هل طول الكلام مضر وجمهورك هيزهق ولا مفيد وجمهورك بيحتاج لشرح وإستضافة ؟
عميلك هيحتاج لإقناع وعرض تفاصيل ومميزات علشان يقدر يحسم قراره انه يتعامل معاك .. ولا مجرد هتدى إشارة لميزة واحدة او سد إحتياج مهم عند عميلك وده كافى !
- هل الاعلان فيه call to action واضح بحيث توجه عميلك إنه يتفاعل أو يشترى ولا لاء ؟
إنت عامل الإعلان علشان عميلك يشترى أو يبدأ يتواصل فقط أو يسجل معاك بشئ معين .. لازم يكون هدفك واضح والأكشن اللى إنت محتاجه موضح لعميلك
اسئلة كتيرة جدا لازم تحطها فى الاعتبار وإنت بتكتب الإعلان الخاص بيك .. وبيتوقف تحديدهم على فهمك لطبيعة منتجتك وكمان عميلك وإزاى بيستخدمه وإيه المخاوف اللى عنده وايه المميزات اللى انت بتوفرها له وازاى منتجك انت هيفرق معاه وهيكون مختلف أو على الأقل مناسب له ولإستخداماته
ثانيا : التصميم الخاص بالاعلان :
المنصات الإجتماعية مزدحمة جدا .. عميلك المستهدف بيشوف يوميا مئات من البوستس المختلفة والإعلانات ونفسيا عقله بيفصل إنه ميركزش فى المحتوى ده كله وبيركز فقط على اللى بيجذبه ويكون مثير بالنسبة له
والإثارة هنا بتتولد من " جملة بتثير جواه إحتياج أو رغبة أو إنتباه " " ألوان بتلفت إنتباه " " تصميم بيشده فى تفاصيله وتركيبه "
فمينفعش تستخدم أى صور والسلام .. لازم تكون دارس جمهورك ومن خلال الدراسة هتعرف هل الصور مناسبة وتشد وايه اللى فيها هيشده وتخلى اللى بيعمل scroll على الفيسبوك أو تويتر هيتوقف عندها ويشوفها .. هل فيه رسالة قوية او شعار مناسب إنت كاتبه بشكل يكون مميز للى هيشوفه ويشد إنتباهه .. هل ألوان التصميم مناسبة ؟
ايه طبيعة ونوعية الصور او التصميمات اللى انت مختارها .. هل هى نشاز او فيه افضل منها او متكافئة مع المحتوى اللى مكتوب ؟ .. وغيرها من اعتبارات بتحطها وانت بتشتغل ؟
ثالثا : الاستهداف او ما يعرف بـ الـ target هل إنت اخترت ودرست جمهورك صح .. هل عرفت هما مين ؟ عايشين فين " اعمارهم ايه ؟ حالتهم الاجتماعية ايه ؟ درجتهم العلمية الحالية ايه ؟ اهتمامتهم ايه ؟ أسلوب حياتهم ايه ؟ نشاطهم على السويشال ميديا بيدور فى ايه بالضبط وبيهتموا بايه فيها ؟
~ ايه هى الميزانية المناسب اللى ممكن تحطها فى الاعلان ده ؟
~ ايه هى الايام المناسبة اللى تشغل فيها اعلانك ؟
~ امتى توقف الاعلان ؟
~ ازاى تقيس نجاحك فى الاعلان ؟
~ إزاى تعرف ان لازم تزود فى الاعلان ده فى اليوم الفلانى او مع اى نتائج بالضبط ؟
طيب وبعدين .. إنت عملت تارجت وكان مناسب جدا ومع ذلك مجابش معاك نتائج فتبدأ تحلل وتشوف هل المشكلة فى التصميم ولا المحتوى ولا من القناة نفسها اللى بتشتغل عليها زى ماحصل مع الفيسبوك فى منتصف شهر 12 وخاصة كل فترة لما بيحصل تحديثات جديدة فى نظام الاعلانات فيه او عموماو اللى أخرها شغالة حاليا من شهرين تقريبا 7 / 2020 حتى تاريخ كتابة المقال ده 20 / 9 / 2020 .
وفى نهاية المقال أحب أقولك :
كل اللى فوق ده لمحة من اللى بيحصل أثناء عمل الإعلان! كل دى أسئلة بيبقى لها وقت ودراسة وتفكير وهموم وضغط ومسئولية .. مسئولية الشغل ومسئولية نجاح ومسئولية ان فيه إيدك فلوس ناس مينفعش تصرفها فى الأرض ولازم تراعى ربنا أولا ثم الناس دى انهم حاطين أمل فى شغلك إنه يبقى مورد دخل ونجاح لهم فى شغلهم خاصة فى الظروف الحالية !
فمتخليش كلام اللى بيقولك " هدخلك 30 الف شخص او 100 ألف شخص يشوفوك " يخدعك .. وبلاش تستسهل الأمر ده لأنها فعلا مش سهلة ومش بسيطة ومش أى حد يعملها على عكس الكلام اللى بيتقال ولو نجحت فى مرة او عشرات المرات فيه عشرات المرات غيرهم هيبقى فيهم فشل والعبرة بالدراسة والتجربة والفهم .
