إيه هو جوجل تاج مانجر ؟ Google Tag Manager وإزاى تستفيد منه ؟
فى متجرك أو موقعك إنت بتحتاج تضيف أكواد تابعة لـ جوجل وفيسبوك وغيرهم
علشان تفيدك فى تحليل زائرى متجرك وأدائهم ومصادر الترافيك المختلفة وهتقدر من خلال النتائج دى إنك تحسن من أداء متجرك وشكله ومنتجاته وكمان هيحسن من إستهداف عملائك فى الإعلانات اللى بتعملها على أى منصة تواصل انت بتشتغل عليها للتسويق لنشاطك
فعلى سبيل المثال
إنت بتستخدم آداة ( جوجل أناليتكس ) علشان تسجل عمليات مختلفة بتتم على موقعك أو متجرك
العمليات دى لها صور كثيرة منها :
- إيه هى الصفحات اللى بيدخلها الزوار لموقعك
- كام شخص دخل موقعك سواء قبل كده أو متواجد حاليا على موقعك
- ايه هى الكلمات المفتاحية اللى بسببها دخلوا على متجرك
- بيفتحوا منين ؟ عملية الشراء نفسها بتتم عن طريق ايه ومسارها لفين ؟
- بتقدر تعمل تتبع لـ الـ UTM's
ولو هتستخدم أداة ( فيسبوك بكسلز – Facebook Pixels ) اللى بتسجل زيارات متجرك عن طريق إعلانات فيسبوك وبتقدر من خلال تعمل تتبع لعملائك وتحديد ايه الأكشن اللى عملوه على متجرك وتقدر تعرف هما مين وتستهدفهم مرة أخرى
وكل ده جزء بسيط جدا من الأدوات دى بتعمله
والأمر مش مقتصر على الإثنين دول فقط وإنما فيه أدوات أخرى كثيرة .. وكل أداة ليها " كود " خاص بيها وبتحتاج فى بعضهم إنك تحط أكواد كل فترة أو تعدل الموجود
وكل ده " خطر "
طيب إزاى مش الأكواد مفيدة ؟ أيوه مفيدة !
بس الفائدة لها ضرر .. إن كثرة الاكواد فى صفحات موقعك هيسبب إن موقعك هيبقى أبطأ ووقت أبطأ يعنى عميل معندوش صبر .. وزيارات بالتالى هتبقى اقل وغير كده ممكن كثرة الأكواد دى تسبب مشاكل لموقعك إنت فى غنى عنها .. ده غير الوقت اللى بتحتاجه علشان تركبها عليه خاصة لو انت مش بتعرف تقرأ الكود أو بتعرف تركبه فهتحتاج لمتخصص غيرك يعملها وبالتالى وقت أطول
وهنا هنرجع لسبب المقال ده .. جوجل تاج مانجر العظيم GOOGLE TAG MANAGER
واللى هو عبارة عن أداة بتديلك كود بتركبه مرة واحدة فى متجرك .. وبيغنيك عن كل ما سبق ذكره من ناحية التركيب والوقت والمشاكل والأضرار اللى ممكن تحصل
مش معنى كده إن " تاج مانجر " بيوفرلك كل الادوات السابق ذكرها وغيرها .. لاء هو بيوفرلك حاجة تانية
بيوفركل إدارة وتنسيق كل " الادوات " و " الأكواد " و " التاجات " المختلفة اللى إنت عايز تركبها فى موقعك
بس بدل ما تركبها فى الموقع انت بتركبها فى " تاج مانجر نفسه " وبوسيلة سهلة جدا جدا مجرد
" طبع – لصق " للكود المطلوب للأداة فيه وبتقدر تشوفهم وتتابعهم من خلاله
وبالتالى صفحات متجرك هتبقى خفيفة ونشطة ومش مليئة بالأكواد الكثيرة وفى آمان
إزاى تستخدمه ؟
بداية بتدخل على الرابط التالى :
https://tagmanager.google.com/#/home
بتسجل بحسابك عليه خاصة لو أول مرة بتنشئه .. بتسجل حسابك بإسم شركتك
بتسجل الرابط الخاص بموقعك
وبتسجل نوع النشاط " موقع ويب " " تطبيق موبايل " ونوعه
وبتوافق على الإتفاقية المعتادة الخاصة بجوجل
بعدها بيظهر ليك الكود الخاص بالتاج مانجر واللى بيقولك ايه المكان اللى انت هتحطه فيه
زى الـ head و الـ Body فى الكود الخاص بالصفحة اللى إنت عايز تعمل تتبع لها أو فى الموقع بأكمله
- ممكن تحتاج لشخص متخصص يركب ليك الكود كبداية
بعد كده بتدخل على " Tags " وبتبدأ فى إنك تنشأ " Tag " جديد وهو ده المكان اللى إنت بتحط فيه
كل الأكواد اللى إنت عايزها من المصادر المختلفة اللى ذكرناها
فبتختار إسم التاج وبعدين بتختار من Choose Tag Type
هتلاقى فيها كل الادوات اللى إنت محتاجها زى Google Analytics وغيرها
طيب ولو ملقتش نوع الكود اللى عايز تحطه .. مفيهاش مشكلة .. الموضوع بسيط بتحط الكود الخاص بالأداة
اللى مش لاقيها عن طريق Custom Html
الأدوات دى وغيرها بتساعدك على تحسين أدائك بإستمرار وبترفع من كفاءة شغلك ومتجرك وإستخدامها ضرورى ومهم جدا
