ازاى تكتب محتوى تسويقى لمتجرك الجزء الثانى - قيم رسالة محتواك

و بعد ما حددت و وصلت لأجابات لمجموعة الأسئلة اللى فاتت ، وصلت لمرحلة تعرف فيها ازاى تحقق أهدافك من المحتوى :

صمم للعميل / المتسوق تجربة تصفح و تسوق جيدة و سلسة عشان توصل لولاءه و رضاه عن اللى بتقدمه من منتجات / خدمات

واهتم ان رسالة محتوى متجرك تكون مختلفة عن اللى بيقدمه أو بيعرضه منافسينك و انها تكون بتضيف حاجة مفيدة لعميلك و مش هيعرف يلاقيها غير عندك

-ركز فى محتواك انه يخلق الوعى عند الزائر بالبراند / بعلامتك التجارية فى صفحات المتجر المختلفة سواء فى صفحة التعريف بالشركة / الكيان / البراند

-راعى ان كتابة المحتوى تكون بأسلوب منظم و غير ممل و خصوصا فى صفحة المنتجات / الخدمات

-راعى أن صيغة المحتوى المكتوب تحفز لشراء المنتجات / الخدمات اللى بتقدمها

-اهتم بعرض المعلومات الموجودة فى المحتوى بشكل بسيط و منظم و غير تقليدى و بدون تفاصيل كتيرة و لا تعقيد فى اسلوب المحتوى و اللى يعتبر جزء من العملية التسويقية على موقعك / متجرك

-وفر اجابات لكل الأسئلة اللى ممكن تدور فى دماغ العميل / زائر المتجر و وفر ليها صفحة خاصة ممكن تكون تحت عنوان ( الأسئلة الشائعة - أسئلة و أجوبة - Q&A)

-راعى كتابة الجمل القصيرة بوضوح و ايجاز لأن النوع ده من الزوار اللى بيدخل موقع / متجر عشان يبحث عن منتج يشتريه بيبقى عايز يعرف معلومات و تفاصيل موجزة و سريعة عنه و عن فوائده و مميزاته أو طريقة استعماله ، بمعنى أصح ( هيدور على الخلاصة) و مش هيقرأ سطور كتيرة أو محتوى طويل الااذا كان فعلا المحتوى شيق جدا و جذاب انه يخليه يسترسل فى قراءته و متابعته للآخر على غير العادة و يكون مفيد و مقنع بالنسبة له

-و اهتم بجودة و احترافية الوصف المكتوب للمنتجات المعروضة و شموله بفوائدة المنتج و مميزاته و تفاصيل زى ( أسعاره - مقاساته - أحجامه - أوزانه - ألوانه - نوع خامات التصنيع - بلد المنشأ )

-وجهه له أسلوب مباشر فى مخاطبته بالمحتوى عشان تقدر تجذب انتباهه و تزود من استجابته بأنه يشعر ان المحتوى موجه ليه هو مخصوص زى تقدر تقدر تقوله ( انت بتعانى من مشكلة كذا و أكيد انت دورت على حلول كتير و المنتج ده هيوفرلك كذا ) و دى تعتبر من أحد الأساليب فى الاقناع

-وفر فى المحتوى كل الحلول المقنعة و اللى تمنع أى تردد أو شكوك ممكن يفكر فيها القارىء لمحتوى متجرك ، و وفر له كل الطرق اللى تطمنه و تأكد له على المصداقية و على جودة المنتج زى عرض ( امكانية تجربة المنتج مجانا - آليات الاستبدال و الاسترجاع فى حالة عدم رضاه عنه )

-اعرض له فى المحتوى المشكلة اللى بتقابله و ان عنده حاجة لحلها مثلا بعد شراءه للشىء ده أو للمنتج أو فى اشتراكه فى العرض 

-وفر شرح وافى و تغطية كاملة لمكونات / مواصفات المنتج اللى هيشتريه 

لأن الوصف بيظهر بعد العنوان الرئيسة فى نتيجة البحث و ليه أهمية فى دفع المتسوق / الزائر للدخول على صفحة موقعك و اختيارها من ضمن النتائج اللى ظهرت قدامه اذا وجد فيها اللى بيدور عليه

-و عشان الهدف الاساسى ان الزائر أو المتصفح لمتجرك ياخد قرار أو يعمل فعل / أكشن معين لازم تكون وجهته ليه فى نص المحتوى و يكون بالنسبة له مقنع بالتوضيح و الشرح و تنجح فى انك تخليه يعمل اللى انت عايزه يعمله

-راعى ان أهم جزئية فى المحتوى انت شايفها تكون مكتوبة فى أول فقرة فى صفحة المتجر لأنه بيوضح من البداية كل المعلومات اللى تهم الزائر 

-ركز على انك تضيف قيمة و مكسب للزائر فى قرائته للمحتوى و اللى وجهته لفعل أو خطوة يعملها داخل صفحات المتجر زى انك توعده أو تقدمه معلومات مفيدة - خصم كبير - عرض خاص مقابل اشتراكه على سبيل المثال فى القائمة البريدية أو هدية عند شراءه منتج معين 

-اهتم بتهيئة المحتوى لمحركات البحث SEO لأنه هيأثر بشكل مباشر على ترتيب موقعك / متجرك و تقييمه بالنسبة للمحركات المختلفة و على رأسهم جوجل Google و استخدم آليات التحسين بما يتوافق مع شروط المحرك نفسه و التزم بما يقترحه عليك 

لأن كل ما يكون موقعك متعلق بالمعلومات و متوافق بالمحتوى اللى بتقدمه كل ما يعلى ترتيبك و تحسين فرصة ظهورك فى نتائج البحث الاولى

(استخدم الكلمات المفتاحية الأكثر بحثا فى نشاط أعمالك و المهمة بالنسبة لاحتياجات عملائك المستهدفين و أهم و أكتر الكلمات و كمات الجمل القصيرة و الكلمات المتعلقة بمنتجاتك بدقة و استخدم المصطلحات اللى بيستخدمها عملائك من الزوار للمتجر  و اللى هيساعدك تحصل عليها بسهولة من أداة Google Keyword planner  )

(روابط الصفحات الداخلية فى الموقع / المتجر بتأثر فى ترتيبه و كمان مدى تناسق الصفحات مع بعضها و قوة الروابط اللى بين بعضهم البعض)

(التحديث للصفحات بيزود من تقييمك على محركات البحث بشكل أفضل بإستمرار و بشكل دورى ( التعديل - التجديد - الاضافة)

-اهتم بتنوع الخطوط و الالوان الموجودة فى نص المحتوى لأنها عوامل مؤثرة جدا فى جذب الانتباه و لفت النظر ، بالاضافة للتنوع ما كتابة عناوين رئيسية و جانبية و اضافة روابط و صور و رسوم للمحتوى و بين الفقرات ، و ده لأن محركات البحث بتلتفت و بتستجيب أكتر للعناوين الموجودة للمواقع مقارنة بالمحتوى نفسه و بتقوى درجة ترتيب الصفحة فى نتائج البحث اعتمادا على ( العناوين الرئيسية)

-اهتم بتنوع رسائل المحتوى و متكونش كلها بتدور حوالين قرار الشراء ،بالعكس مهم انها تتضمن معلومات مفيدة للمتسوق زى عرض الموضوعات أو المقالات المتنوعة بإضافة قسم المدونة داخل متجرك على حسب مجال عملك و نوع منتجاتك أو خدماتك و بما يناسبها سواء هتعرف بيها عملائك تاريخ العلامات التجارية للمنتجات اللى بتقدمها و تقدم من خلالها قيمة معرفية و استرشادية عن أنواع المنتجات المختلفة و اللى بتلبى احتياجات العملاء 

مثال : لو كانت تجارتك بتتمثل فى عرض و بيع الملابس الخاصة ببراند بتاعتك أو براند عالمية أخرى مشهورة ، من المهم ان مدونة موقك تكون بتحتوى على موضوات فى مجال الفاشون و الأزياء و تاريخ المصممين المشهورين و كيفية تناسق الألوان و تاريخ و قصص صناعة المنتجات ، بالاضافة لأشكال الموضوعات و المقالات اللى تجاوب على أسئلة الجمهور من العملاء 

-اهتم بتنوع أشكال المحتوى على موقعك ما بين (الفيديوهات - الاحصائيات و الارقام على شكل انفوجراف - صور متحركة و ثابتة - و غيرها من عوامل الجذب البصرية )

-راعى التوقيت الزمنى لكتابة محتوى جديد فى المتجر خصوصا فى فترة ( المناسبات - الأعياد - و الأحداث المختلفة ) من خلال تقديم محتوى يتضمن العروض و الهدايا و الخصومات و كل اشكال المفاجآت و تحميس العملاء 

تقدر بعد كده تقيم جودة و أسلوب كتابتك للمحتوى و تعرف مدى وصول رسالتك بالشكل المطلوب و مدى تحقيق أهدافك بمجموعة طرق من خلال :

-تحليلك و تتبعك لعدد المشاهدات على صفحات الموقع / المتجر

-عدد الزيارات و معدلات الدخول بعد اضافة المحتوى 

-الكليكات الخاصة بالروابط اللى كانت متضمنة فى محتواك و اللى وجهت المتصفح / الزائر ليها

-عدد الزوار و المتابعين الحاليين لموقعك / متجرك

-عدد عمليات البيع اللى تمت على المتجر بعد اضافة المحتوى و مدى استكمال اجراءات و خطوات الشراء النهائية

مواضيع ذات الصلة :

-ازاى تكتب محتوى تسويقى لمتجرك الالكترونى - الجزء الأول حدد أهدافك ... اقرأ المزيد 

-كيف تنجح فى عملية التسويق على الانترنت لنشاطك ومشروعك - خطوات عامة ... اقرأ المزيد 

-السوق الجزء الأول - تعلم كيف تنافس في التجارة الالكترونية ... اقرأ المزيد