كيف تنجح فى عملية التسويق على الانترنت لنشاطك ومشروعك - خطوات عامة

-  هنقولكم خطوات بسيطة فى حجمها لكنها مهمة جدا ويجب مراعاتها فى العملية التسويقية على الانترنت خاصة 

أولا : خطة إستراتيچية للسوق الخاص بنشاطك :

 -  ودى بتحتوى علي دراسة الجمهور المستهدف ودراسة المنافسين وطرق إستخدامهم للتسويق الإلكتروني بالسوق بحيث تقوم علي الإدارة المناسبة لعملية التسويق الإلكتروني الخاصة بخدمتك أو منتجك .

واللى من خلالها الخطة دى هتقدر تحدد أهداف عملية التسويق وإيه الإستراتيجية اللى هتمشى عليه علشان تحقق الأهداف دى ؟! وإيه هى خطوات تحقيق الإستراتيجية  ؟!
كمثال : من أهداف خطة التسويق تحقيق مبيعات للمنتجات أو الخدمات اللى احنا متخصصين فيها ( خدمة ادارة الاعلانات و التسويق ..من هنا)

وبالتالى هنعمل إستراتيجية خاصة للهدف ده بإننا نعمل حملات إعلانية بعروض خاصة وكوبونات خصم مدتها 6 شهور بقيمة 15 % على أى عملية بيع من خلالنا

وهنحقق الحملات دى عن طريق منصة ( Facebook ) عن طريق إعلانات ( Engagement و إعلانات Messages ) بميزانية شهرية بتتراوح ما بين 5000 ألاف إلى 8000 ألاف جنيه مصرى .. مع التوجيه فى الحملات دى على صفحات Landing Pages داخل المتجر الإلكترونى الخاص بنا وربط الصفحات دى بـ Facebook Pixels  لضمان الإحتفاظ بقاعدة بيانات خاصة بالعملاء المستهدفين من الحملات وتحليلها فيما بعد للإستفادة منها فى تحسين التارجت الخاص بنا

وهكذا بتكمل باقى خطواتك وأهدافك زى إيه نوع المحتوى اللى هتستخدمه .. هتوصل إزاى للشرائح المختلفة من عملائك او الشريحة الخاصة بيك .. هتوصل لهم على إيه وإزاى ؟ هتقدم لهم إيه .. عايز تحقق أهداف إيه من عملية التسويق على مدار كل شهر أو سنة

ثانيا : وجود قنوات خاصة بك على شبكات التواصل الإجتماعى  ( السوشيال ميديا )  :

-  لأن القنوات دى هى بمثابة قواعد ثابتة وأساسية تقدر تنطلق منها فى العملية التسويقية الخاصة بيك وكمان تقدر تستغل الادوات اللى كل قناة بتوفرها ليك فى التواصل والانتشار والترويج لـ " نشاطك – خدمتك – منتجك مع الجمهور المستهدف " .. وتقدر تقدم عليها باستمرار كل ما ترغب . وطبعا لازم تحدث بإستمرار محتوى القنوات دى ومنهم بشكل رئيسى "website " ومنهم " Facebook – twitter - YouTube "
وهنا فيه نقطة مهمة لازم ننوه عليها .. نصيحة من تجارب عديدة فى مجال التسويق الإلكترونى على مدار أكثر من 8 سنوات .. لا تترك أى قناة سوشيال ميديا لايوجد عليها تواجد لك .. الفرق فقط هيكون فى نسبة التواجد .. لكن على مر السنوات الماضية ظهرت قنوات تواصل جديدة ومختلفة وأثبتت الأيام إن الجمهور الخاص بيك ممكن يتواجد عليها بل ويزداد وبشدة زى منصة Instagram والى بدأت كمنصة لتبادل الصور ورفع الذكريات ومشاركتها وتحولت لمنصة بيتم من خلالها التسويق لمنتجات معينة متعلقة بجمهور ( النساء ) وبقت أنجح بكثير من منصات أخرى فى المجال ده .. وأيضا على سبيل المثال منصة TikToK واللى كانت تشتهر فقط بتواجد الشباب والبنات فى سن المراهقة فقط عليها واللى تحولت حاليا لمنصة ضخمة بيتواجد عليها فئات عمرية مختلفة فى اهتماماتها وطبقاتها وبقت قناة حية وتفاعلية للتسويق

وبقت مفيدة لتسويق مجالات متعددة زى : الملابس – الإكسسوارات – الأكل والمطاعم .. حتى الاجهزة الكهربائية !

فحافظ على وجودك ولو بنسبة بسيطة علشان تقدر تتبع جمهورك بإستمرار أفضل ما تبدأ من الصفر

ثالثا : تحديد الأدوات الخاصة بعملية التسويق  :

-  بتحدد هنا إنت هتشتغل بإيه .. هتهتم أكثر بـ seo ولا تشتغل على جوجل أدورد ولا تركز على إعلانات فيس بوك ! .. هتشتغل محتوى " صور – كتابة – فيديوهات " ومين أنسب وأفضل ولا كلهم وكيفية وضعهم .. وغيرها من الأدوات والطرق اللى بتقدر من خلالها تنفذ العملية التسويقية وتحقق أهداف خطتك .

وهنا لازم تحط أمامك كل القنوات الخاصة بالتسويق مش ( سوشيال ميديا فقط ) ولكن كافة قنوات الديجتال المختلفة بما فيها ( المتجر – الموقع ) واللى هيحسم قرارك فيهم هو تواجد الشرائح المستهدفة من عملائك بيبقى فين أكثر .. السلوك الشرائى لعملائك المحتملين بيبقى غالبا بيتم على إيه !

وبناءا عليه بتقدر تضع أولويات لعملية التسويق وأدوات التسويق المختلفة اللى ممكن تستخدمها فى شغلك

وإهتم إهتم بالادوات اللى بتساعدك على التحليل .. زى تحليل زيارات متجرك الإلكترونى .. زى أدوات جمع بيانات زوار الموقع أو مرتادى موقعك أو صفحاتك على شبكات التواصل الإجتماعى .. ومن أهم الادوات دى  :

Google Tag Manager -  Google Analytics - Google search console  - Facebook pixels .. ومنها المجانى ومنها المدفوع زى MOZ وغيرهم كثير المهم

انك تقدر تستفيد من البيانات والتحليلات اللى بتستخرجها وتعرف توظفها بشكل سليم

رابعا : وجود متخصصين للتواصل مع العملاء أثناء وبعد البيع  :

 -  لابد إن يكون المختص بالرد على الأسئلة والاستفسارات والمسئول عن توجيه الناس وإقناعهم أو إمتصاص غضبهم فى الشكاوى أو حتى الصبر على قلة أو عدم علمهم بما تقدمه .. لابد إنه يكون " لبق – صبور – ذكى – سريع البديهة – يقظ – ملم بما تقدمه سواء كان " منتج – خدمة .. إلخ "

-  والموضوع ده تحديدا مهم جدا .. لأن لازم تنقل صورة جيدة للعملاء والجمهور لتنال ثقتهم .. وكمان بتوصل لهم إن الرد عليهم وخاصة لما يكون فيه سرعة فى الرد إن أسئلتهم بتنال الاهتمام والأولوية من الشركة .

بالإضافة لخدمة ما بعد البيع واللى بتبقى من العوامل المهمة اللى بترفع من سمعة شركتك عند عملائك وبتساعد على زيادة التسويق ليك من خلال الـ Word of Mouth وترشيحاتهم ليك ولمنتجاتك او خدماتك

-  وأخيرا.. فكر بإستمرار وراجع وخليك مطلع دوما على كل ماهو جديد وأهم شئ .. حط نفسك مكان العميل اللى انت عاوز تبيع له او يتعامل معاك .. حط نفسك مكانه وشوف هو عاوز إيه ! .. هو هيستقبل الدعاية إزاى .. ازاى توجه له الكلام والمحتوى .. ايه اللى ينفع مع طبيعة الجمهور اللى انت مستهدفه وايه اللى مينفعش

تابع الأحداث اللى بتحصل حواليك وحاول إنك تستفيد منها بالإيجاب ناحية مبيعاتك وشغلك .. وإهتم بإنك تقدم تجربة لطيفة وسهلة لعميلك

مواضيع ذات الصلة :

-ازاى تعمل خطة مبيعات ناجحة SALES FUNNEL ...اقرأ المزيد 

-أخطاءشائعة فى التجارة الالكترونية - الجزء الأول ... اقرأ المزيد 

-ازاى تستخدم موقعك الالكترونى فى التسويق و الانتشار على المنصات المختلفة ؟ ... اقرأ المزيد