عناصر إحترافية فى متجرك Landing page
- المتجر الإلكترونى مهم جدا وبيمثل قاعدة أساسية لشغلك على الإنترنت
بس المتجر مش مجرد ( منتجات ) بتتحط وبتعرضها فقط .. المتجر هو واجهتك اللى منها اللى بتشتغل عليه بيع لمنتجاتك وترويج لها
و بتحرص من خلاله انك توصل لعملائك وتتبادل معاهم حاجات زى :
- الثقة
- الفهم
- السهولة والراحة
طيب الحاجات دى تحققها إزاى ؟
- الثقة : إنت بتحققها من جودة منتجاتك او خدماتك .. ومن التسليم الجيد ومن الأراء الجيدة اللى بتستقبلها من عملائها بعد الشراء وبتعرضها على متجرك وقنوات السوشيال ميديا الخاصة بيك :
- الفهم : بإنك تعامل عميلك وتراعيه فى إنك تفهمه المنتج هيفيده بإيه .. ليه هو مميز .. هيستخدمه ازاى .. وتشرح له بشئ من التفصيل شوية
- السهولة : إن الوصول للمنتج وعملية طلبه وشرائه .. والبحث من خلال موقعك وتسمية المنتجات ومواصفاتها .. كل ده يكون معمول بشكل خاص
وكمان فيه حاجات بتعملها او بتضيفها على منصتك التجارية بتساهم فى تحسين أدائك وشغلك ومتابعتك
مع عملائك واستهدافهم بشكل متميز
وبالتالى ده بينعكس بشكل إيجابى على مبيعاتك وبيكون له أثر كبير فى زيادتها
ومن الحاجات دى :
– صفحات مميزة Landing page لمنتج /ات معينة :
من الصفحات اللى انت بتصممها بشكل خاص على ( منتجات ) معينة عندك .. بتبدأ الصفحة بمعلومات أو عرض للإحتياج
والصفحات دى بيبقى لها أكثر من فكرة أو شكل .. بس الغرض منها دائما واحد : انك تمشى مع عميلك فى رحلة صغيرة بتقنعه فيها بالمنتج وبتشرح له أهم ما فيه
وازاى المنتج متوافق مع الحاجة اللى العميل محتاجها وبيبقى لها عدة أغراض :
- إما جمع بيانات من العميل .. زى رقم تليفون أو إيميل .. بحيث إنه مش شرط يشترى بس انت هتقدر تسوق له فيما بعد عن طريق بياناته
- إنه يشترى بشكل مباشر منك .
- طيب إزاى أعمل Landing page تكون فعالة ؟!
هى ملهاش طريقة معينة أو ثابتة .. وإنما بتختلف حسب الفئة اللى بتستهدفها والمنتج اللى انت بتبيعه
بمعنى :
فيه منتجات هتحتاج منك لشرح وتفصيل وتفسير لإحتياجه ولمميزات المنتج اللى عندك وليه يشترى منك إنت تحديدا !
وفيه منتجات أخرى مش بتحتاج أكثر من تفصيل سريع لأهم المميزات لأن عليها طلب بالفعل
وفيه نوعيات من العملاء بتحتاج تدقق وتفحص وتفكر قبل ما تشترى وده برضه راجع لـ طبيعة المنتج هل هو حاجة لو باظت او حصل فيها مشكلة بعدين ده هيسبب أزمة للعميل ولا لاء .. هل العميل أول مرة يشترى منك ولا هو عميل سابق ليك .. السعر غالى أو مرتفع وبالتالى هيفكر ألف مرة قبل خطوة الشراء
واحنا هنا بنتكلم عن أى منتج بداية من المنتجات البسيطة زى شاحن موبايل أو ملابس أو حتة ميكروويف وموبايل أو عقار ما!
وهنتكلم فى مرات أخرى عن أمثلة مختلفة منها لكن هنقول بعض النصائح العامة هنا لـ ازاى تعمل Landing page فعالة
أول حاجة : الـ Landing page بتبقى صفحة منفصلة لوحدها مش الـ Home
الـ Landing page بتبقى عملية تنازلية .. بتبدأ من أول الصفحة بالعرض وبتمشى كأنك بتحكى حكاية
بتبدأ فيها من أول :
- عرض المشكلة / الإحتياج / العقبة .. اللى عند العميل
- عرض الحل بشكل عام وهيحلها إزاى أو هيوفر إيه له
- عرض مميزات ( الحل / المنتج / الخدمة ) اللى انت بتوفرها
- توضيح ليه إنت أحسن وأضمن وأفضل حد ( العميل ) يشترى منه
وتختم بـ CTA أو Call To Action .. وده بيبقى قرار الشراء من العميل بعد العرض السابق وهو بينزل فى الصفحة الخاصة دى
وهنا انت بتواجه حاجتين :
- العميل هيشترى بالفعل .. وهنا مش بيبقى محتاج إلا button واضح بيدخله فى عملية الشراء .. ولازم تخلى عملية وخطوات الشراء سهلة وبسيطة عليه بدون أى تعقيدات أو صفحات كتيرة بيدخلها علشان يختار المنتج ويحطه فى سلة الشراء ويحط بيانات الشحن ويدفع أو يتمم عملية الشراء
كل ما كانت الخطوات أسهل ومش طويلة كل ما نجحت فى إقناع العميل
- العميل متردد لسه أو مقتنعش ومش هيشترى دلوقتى .. بس هو دخل بالفعل الصفحة فهو مهتم وهنا بتطلب منه يسجل أى من بياناته الأساسية ( إيميل – رقم تليفون ) بحيث تقدر تستهدفه فيما بعد برسالة تسويق مختلفة بالمنتج ده
- طيب ولو محطش أى بيانات ولا كمل فى عملية الشراء وقفل الصفحة ؟!
- الموضوع بسيط .. فيه أدوات مختلفة بتخليك تقدر تعمل تتبع Track للعميل اللى زار الصفحة دى .. وتقدر تعيد إستهدافه مرة أخرى ومرات أخرى بكل سهولة .. ومش بس زار الصفحة لاء ممكن كمان يكون عمل Action معين فى الصفحة زى إنه داس بالفعل على button الشراء بس مكملش عملية الشراء عندك فتقدر تستهدف الناس دول بالتحديد .. ومن الحاجات دى وأشهرها Facebook pixels
- لو منتجك أو خدمتك بتسمح إنك تقدم للعميل تجربة مجانية ( وده بينفع فى الخدمات او المنتجات الأونلاين والبرمجيات ) فمتترددش إنك تعرض عليه فى النهاية تجربة مجانية وتكون واضحة جدا فى button بس يكون أسفل button الشراء وتسجيل البيانات .. ساعتها هتقدر تفتح باب مباشر بينك وبين العميل ومتخسروش
من الحاجات المهمة اللى لازم تراعيها برضه :
- متحطش محتوى كتير علشان عميلك ميزهقش .. إتكلم باختصار غير مخل وبيوصل المضمون بسهولة
- إستخدم صور معبرة أو فيديو قصير من 40 ثانية لـ 1 دقيقة .. بيتكلم عن المشكلة / الحل / المميزات .. وتكون واضحة .
- إكتب صح .. إكتب صح .. إكتب صح .. وخد بالك من الأخطاء الإملائية وإختار كلمات مناسبة .
- لو تقدر تحط ( فيديو – سكرين شوت ) لتجارب مستخدمين سابقين لخدماتك أو منتجاتك .. مترددش تحطها هتفرق مع العميل .. بس يُفضل تحطها كرابط أثناء العرض
زى كده : بإمكانك مشاهدة أراء عملاء سابقين قاموا بشراء هذا المنتج بالفعل : ولما يضغط على الجملة هيفتح فيديو على موقعك فيه الريفيو أو الفيديو يكون ظاهر فى نفس البيدج .
- فى مقالات قادمة هنوضح ليك وسائل أخرى لعمل Landing page إحترافية ومناسبة مع عرض أمثلة خاصة على منتجات او خدمات معينة
فتابعونا
