ازاى تحقق زيادة فى المبيعات على متجرك الالكترونى من غير اعلانات ؟!
هل ممكن تزود من مبيعات منتجاتك على المتجر الالكترونى من غير ما تعمل اعلانات ؟!
زى المعروف ان الاعلانات المدفوعة أو الحملات الاعلانية على السوشيال ميديا ( فيس بوك و المنصات المختلفة ) مهمة لترويج المنتجات و تحقيق المبيعات و الربح ، و لكن لو كنت عايز تزود من مبيعاتك و فى نفس الوقت عندك مشكلة فى الميزانيات اللى بتصرفها على الحملات على أى وسيلة اعلانية أو عايز تسوق لمنتجاتك بشكل مختلف، فا فى طرق تانية فعالة تقدر بيها تحقق بيها الهدف ده من خلال متجرك الالكترونى و مش بس تجذب زوار جدد لموقعك لا كمان تنشط العملاء القدامى و الحاليين و تدعم ولائهم لمنتجاتك و تسهل ليهم اتخاذ قرار الشراء، من الطرق دى :
1- استخدام استراتيجية التسويق من خلال الأشخاص المؤثرة أو عمل شراكة مع الـ influncers و الأشخاص المعروفة و المشهورة عند جمهورك المستهدف و ده بعد ما تدرس فئة جمهورك كويس و تحدده و تقسمه لشرائح و فئات ( على سبيل المثال لو كان نشاطك التجارى فى الفاشون و الأزياء و الملابس و جمهورك من السيدات و الفتيات ) فهيبقى نوع الأشخاص المؤثرين لفئة جمهورك فى المقام الاول الـ bloggers و الموديلز
فهتبقى مهمتك انك تحدد رسالتك التسويقية وازاى هتقدر توصلها لجمهورك و ايه الهدف منها و ازاى هتقيسه و ازاى تختار الـinfluncer المناسب ليها ، سواء هتطلب رأيهم فى منتجاتك من خلال ارسال عينة منها أو بأى شكل من أشكال المقابل ، و ده عشان يشجعوا متابعينهم من جمهورك على شرائها بشكل مباشرسواء فى شكل Reviews منهم أو فيديوز أو posts تتعرض فيها منتجاتك.
أو من خلال اعلانهم عن مسابقة و اختيار فائزين منها و غيرها من الاختيارات و الأساليب اللى بتستخدم فى النوع ده من الاستراتيجيات التسويقية
2-استخدام استراتيجية ( الفرصة الأخيرة ) مع اضافة العبارة المشهورة ( متفوتش الفرصة - اشترى الآن - اغتنم الفرصة - لا تفوت هذا العرض) و غيرها من الجمل و العبارات التسويقية اللى تقدر بيها تشجع عملائك على الشراء الفورى للمنتجات و تخويفهم من الخسارة أو ضياع الفرصة من هذا العرض ( التخفيضات - الهدايا )
و ممكن تستخدم الطريقة دى فى الـ landing pages أو صفحة منتج معين مراد تسويقه، أو عن طريق ارسال بريد الكترونى أو رسالة واتساب أو SMS لقائمة عملائك السابقين أو من خلال طريقة تانية ، و هى مراجعة المنتجات الموجودة فى قائمة اهتمامات عميلك أو الـ favourite (المفضلة) أو عربات التسوق للحسابات المسجلة على متجرك الالكترونى و ارسال اشعارات و تنبيهات بإقتراب هذا المنتج على النفاذ و استعجال العميل او المتسوق السابق على شرائه بكونه وسيلة و محفزه قوى ليه يدفعه على اتخاذ قرار الشراء فى الحال.
-وكتير من المتسوقين بعد ما يختاروا المنتج و يضيفوه لسلة الشراء على المتجر الالكترونى بيوصلوا لآخر خطوة و هى الدفع و اتمام عملية الشراء و مش بيكملوا و ممكن ييتراجعوا عن قراراهم او يأجلوه لوقت تانى فى الحالات اللى زى كده مهم تبعت رسالة لعمليلك عن طريق البريد الالكترونى من خلال بياناته اللى سجلها على المتجر أثناء مراحل عملية الشراء و تشجعه لاستكمال عملية الدفع و الشراء سواء من خلال خصم - عرض خاص على المنتج ده - تسهيلات فى الدفع و الشحن وغيرها من الأساليب التحفيزية و تستغل اهتمامه السابق بالمنتج و تجدد نيته الشرائية.
و ممكن كمان تجمع بيانات الزوار لموقعك او متجرك الالكترونى اللى لسه متحولوش لعملاء فعليين و تبعتلهم عروض على منتجات معينة من خلال تحليلك لاهتمامتهم أو من الصفحات اللى دخلوا عليها فى موقعك و مدة استمراهم فى كل صفحة أو تسلط الضوء و تركز على منتج واحد فى رسالتك و يكون الأفضل مبيعا و الأفضل تقييما و طلبا فى متجرك و تبين فوائده و مميزاته و كمان نماذج لآراء عملائك فيه بعد الشراء
3-استراتيجة الـ cross sellوup sell ، كنوع من زيادة قيمة الطلب أو عملية البيع على المنتجات،
فا عند وصول عميلك / المتسوق للخطوات النهائية فى اكمال عملية الشراء ممكن تعرض عليه منتج مكمل او اضافى للمنتج اللى على وشك انه يشتريه و ده هو الـ cross sell ، أو انك تعرض عليه منتج أعلى أو اصدار أفضل من المنتج اللى قرر انه يشتريه عن طريق اظهار مقارنه بين اكتر من منتج تانى يتفوق على المنتج ده و تفاضل بينهم و ده بقى الـ up sell ، و عليك انك تحدد أفضل المنتجات اللى هتعرضها للمقارنة أو البيع و تجرب كل استراتيجية منهم على متجرك لفترة و تقيس معدل التفاعل معاها و تكررها بأكتر من شكل.
4-استخدم الـ Referral program زى الكوبونات و أكواد الخصم و تجميع النقاط و برامج الولاء المختلفة اللى ممكن تقدمها بشكل خاص و حصرى لعملائك المميزين أو لعملائك الحاليين يشاركوها مع أصدقائهم و معارفهم
كنوع من المكافأة و التميز اللى هيفيدك فى الحصول على عملاء جدد و الانتشار و توسيع قاعده عملائك و زبائنك و تنشيط المبيعات على متجرك ، ده غير ثقة و ولاء اكتر فى منتجاتك و تبادل التوصيات منهم لغيرهم من الزبائن.
5-اهتم ببناء community خاص بعملائك سواء السابقيين أو الجدد ، عن طريق انشاء و تكوين مجموعات groups على منصة الفيس بوك أو تويتر أو واتساب مش بغرض البيع بشكل مباشر و لكن للتفاعل فيها مع جمهورك ، بتوفير الدعم ليهم و الرد على اسئلتهم و استفساراتهم مباشرة ،
و تفتح بيها مجال للمناقشة فى موضوعات مختلفة تفهم بيها اهتماماتهم و ميولهم و شكل الحياة لكل فئة منهم و رغباتهم ، و كمان تسمعهم و تشجعهم يقولوا رأيهم فى منتجاتك عشان تبنى ثقة و علاقة قوية معاهم و توصلهم شعور بالتميز و الخصوصية و الانفراد لكونهم عملاء لمنتجاتك و للبراند بتاعك.
جرب الاستراتيجيات و الطرق اللى فاتت و اللى وضحنا بعض تكتيكاتها و طبقها على منتجات متجرك الالكترونى و قيس نتائجها على معد مبيعاتك و شوف و قارن أنهى الانجح منهم و امتى تستخدم كل واحدة منها و توقيتها المناسب
و مع انهى نوع المنتجات أو انهى فئة من العملاء.
مواضيع ذات الصلة :
-SALES FUNNEL - TOFU - خدع ونصائح عن جذب العملاء - الجزء الأول... اقرأ المزيد
-التسويق للمنتج - Product Marketing - الجزء الأول..اقرأ المزيد
