فى الموضوع ده هنستعرض ايه هو الشات بوت chatbot وهيساعدك فى ايه و ازاى تشتغل بيه على متجرك الالكترونى و كمان امثلة عليه

الشات بوت بشكل بسيط و بتعريف مختصر هو خاصية الرد الآلى و التلقائى فى المواقع الالكترونية ، ممكن تكون صادفته قبل كده أثناء تصفحك لمواقع على الانترنت و أقرب مثال ليه هو ماسنجر الفيس بوك و اللى بيعتبر نوع من أنواع الشات بوت اللى ممكن تستخدمه بشكل منفصل أو بالربط مع متجرك الالكترونى و ده هنشير ليه فى شكل مفصل فى جزئية أنواع برامج الرد الآلى chatbot 

خاصية الرد الآلى - الدردشة، بتستخدمها كتير من العلامات التجارية و الشركات لتقديم خدمة العملاء و اقتراح المنتجات لهم و بالتالىزيادة المبيعات

لأنه بيعتبر جزء أساسى من تجربة التسوق عبر الانترنت و لها تأثير مباشر على المبيعات و ده بيزود من الميزة التنافسية بين المتاجر الالكترونية و ده لأنه بيتضمن مجموعة من المميزات و الفوائد المهمة منها انه :

-بيقلل من تكاليف فريق العمل و  خفض تكاليف دعم العملاء و المستهلكين  و التواصل24/7 و  اللى منه اهدار للوقت

-بيعتبر من الحلول التسويقية الفعالة

-بيساعد فى تحسين معدلات التحويل من عربات التسوق و استكمال عملية الشراء مع العميل

-بيزود من التواصل و التفاعل الشخصى بين الزائر و المتجر

-بيقدم المساعدة للمشترى بالرد على سؤال أو استفسار أو البحث عن شى ما داخل المتجر

-بيكون مع المتسوق فى مراحل الشراء و حتى فى حالة خروجه من المتجر و عدم استكمال عربة التسوق

-استخدام العميل للشات بوت بيغنى عن تسجيل بياناته أو معلوماته فا تقدر من خلاله ترجعله تانى و تتواصل معاه و كمان تبعتله رسائل تحفيزيه أو عروض 

-بيقوم بمهمة اعلام عملائك بأحدث المنتجات و السلع و بث رسائل ليهم فى وقت واحد

-بيقدم خدمة و دعم للمستخدمين ، بالاضافة لـ ارسال العروض الترويجية للعملاء 

و عرضت احصائية من تقرير Ubisend الاخير ان كل 1  من 5 مستهلكين ممكن يفكر فى شراء أى سلعة او منتج بمساعدة برنامج الدردشة الآلى ، و  ان 40% من العملاء بيحتاجوا يشوفوا العروض  الجديدة من برنامج الدردشة الآلية

هيساعدك فى ايه الشات بوت ؟

- الشات بوت بيتابع مع العميل سلة التسوق بالمتجر، اذا كان اشترى المنتجات اللى فيها و  لا و ايه السبب ، و هل محتاج مساعدة لاستكمال أو لتواصل عملية الشراء ؟

- تقدر تستفيد من أدواته زى (رسائل الترحيب بالمستخدم لحظة دخوله الموقع ،حتى لو كنت غير متاح أونلاين فى التوقيت ده ، و فيها بيحصل البرنامج على معلومات المستخدم و بيحولها بعد كده فى صورة analysis تفيدك فى اعادة التفاعل و التواصل مع المستخدم مرة أخرى ، فا هيحللك مشكلة الرجوع للعميل السابق

لأنه بيقدم رسائل مخصصة بإسم عميلك ، على سبيل المثال ( مرحبا يا فلان .. هل تريد المساعدة ؟! ) أو ( العروض أوشكت على النفاذ .. هل تريد أن تحصل على المنتج؟ ) ، وتقدر تحدد اللغة اللى تكلمه بيها و تخصص ردود و صورة معينة للمستخدم

و تقدر من خلاله تجهز مجموعة من الاسئلة و الردود التلقائبة اللى محتمل يحتاجها عميلك، و كمان تحدد توقيتات الرد و سرعته و المدة المستغرقة  فى كل رد و بعد كده تقدر تستأنف المحادثة من مكان ما وقف برنامج الشات بوت مع العميل

-بيقترح علي المتسوق المنتجات بناء على سلوكه السابق و تحليل البرنامج لاهتماماته و تفضيلاته أثناء تصفحه لصفحات المتجر ، فا بيقدمله اللى يجذبه و يثير اهتمامه فى المرة المقبلة فى زيارته للمتجر.

وبناء على احصائية ان 83% من المتسوقين عبر الانترنت بيحتاجوا المساعدة لاكمال طلب الشراء و بيتوقع 75 % منهم الدعم و المساعدة من المسئولين عن المتجر فى خلال خمس دقائق و اما بيخرجوا من المتجر فى أقصر وقت 

أمثلة على أشكال برامج الرد الآلى أو التلقائى ( الشات بوت )

 فيه أكتر من نوع ، منهم اللى بيتطلب برمجة و كود و بيبقى داخل المتجر نفسه كا plugin، و منهم مش بيحتاج اى نوع من البرمجة و بيكون فى مواقع و تطبيقات خارجية منفصلة ممكن تربط اعدادتها بمتجرك ، سواء مجانى توظفه على حسب احتياجاتك و فئة عملائك المستهدفين زى Messenger- chatfuel أو مدفوع بخواص و مميزات اضافية  زى Kik - Motion A.I

و تقدر تقيس نتائج و فاعلية الـchatbot بمعدل التحويلات و الـ sales conversion أو تحصل من خلاله على تحليلات سواء من مصدر خارجى أو  اللى بيوفرهالك الشات بوت نفسه ، ده غير معدل الـengagement و الـ retention ratesو الـ tracking  و اد ايه هو بيسرع من عملية البيع مع عميلك

-و من أمثلة البراندات اللى طورت برنامج الرد الآلى و بوت تفاعلى خاص بيها هى براند الملابس العالمية  H&M 

اللى خصصت روبوت بيقدم اقتراحات للمستخدمين و المتسوقين بالمنتجات بناء على تفضيلاتهم و طلبهم من خلال تحديد صور الملابس اللى تعجبهم و بعد تحديدهم للستايل الخاص بيهم ( سواء كاجوال - كلاسيك - فورمال -....) و ده عن طريق طرح أسئلة و خيارات لتحديد نمط و أسلوب و معلومات مخصصة عن اهتمامات المستخدم و ده بغرض انشاء ملف تعريفى خاص بيه على البرنامج

تانى براند Pizza Hut :  اللى وفرت لعملائها طلب البيتزا ببساطة عن طريق برنامج الدردشة من خلال الـ messanger  لتويتر و فيس بوك و يقدر العميل يحتفظ بنوع البيتزا المفضله عنده ويطلبها تانى فى أى وقت و تميزها فى مساعدة المستهلكين فى تحديد المنتجات اللى بيدوروا عليها و محتاجينها فى اقل وقت ، بالاضافة الى ان برنامج الدردشة الآلى chatbot بيقدم اجابات على الأسئلة الشائعة أو المعلومات عن العروض الترويجية الخاصة بيهم و ده كله محاولة من البراند لتسهيل طلب المنتج على العميل بدون الحاجة للاتصال بخدمة العملاء و لكن فقط  من خلال ارسال رسالة ، و اللى عمل على تحسين المبيعات بشكل كبير

تخيل بكل المميزات اللى عرضناها فى الموضوع انك بتوفر لعميلك دعم و مساعدة و رد على كل تساؤلاته و استفساراته و كمان تشجعه و تختار معاه المنتجات اللى بيدور عليها و تمشى معاه فى مراحل الشراء ، ده اللى هيحققهولك الـ chatbot  ده غير الفوائد و المميزات اللى هتخدها منه فى  تعزيز الولاء للعلامة التجارية

فا بمنتهى السهولة تقدر تجيب زوار لمتجرك بإستخدام برنامج الدردشة الآلى و ترد على أسئلتهم على مدار الساعة طوال أيام الاسبوع و تحتفظ بقدر كبير من العملاء و تسهل عليهم اختياراتهم و توفرلهم كل المعلومات الاضافية لمنتجاتك بمجرد استخدامك لكلمات خاصة بيهم فى شكل أسئلة و ردرود

و كمان تقلل من نسبة خروج عملائك من المتجر فجأة بدون استكمال عملية الشراء أو ترك سلة التسوق فجأة ، و تقدر تربط و توصل البرنامج بسيستم المبيعات عندك أو CRM لتقديم اقتراحات لعملية المبيعات و حصر العملاء الجدد على المتجر.

مواضيع ذات الصلة :

-عناصر إحترافية فى متجرك LANDING PAGE ... اقرأ المزيد

-ابدء تجارتك الالكترونية الان - الجزء الأول... اقرأ المزيد

-ايه اللى بيميز منصة تجارة الكترونية عن غيرها ؟... اقرأ المزيد