ما معنى دورة حياة المنتج - Product life cycle

لو كنت entrepreneur أو business owner  أو حتى عندك فكرة مشروع و لسه هتبتدى فالموضوع ده هيكون مهم ليك انك تعرف و تفهم كل تفصيله فيه لأنك هتمر مع مشروعك او المنتج اللى بتبيعه بكل المراحل اللى هنستعرضها كلها بالترتيب
و اللى على أساسها هتحدد الوقت المناسب عشان تتوسع فى أسواق جديدة أو تغير ف شكل منتجك أو تخفض فى الأسعار أو تزود فى الاعلانات و ده من خلال ادراتك لدورة حياة المنتج
ادارة دورة حياة المنتج  Product life cycle management   تسمى عملية وضع الاستراتيجيات لطرق زى الدعم و الصيانة المستمرة للمنتج أو الخدمة اللى بيقدمها مشروعك و معرفتك للمراحل اللى بيمر بيها المنتج فى نموه و تطوره بتساعدك فى عملية اتخاذ القرار المناسب و السليم لكل مرحلة انت فيها بداية من التسعير و الترويج و فى كمان فى حالة التوسع أو الاضطرار لخفض التكاليف و تغيير شكل التسعير و ده شكل بيوضح الـ 4 مراحل من دورة حياة المنتج قبل ما نستعرضهم بالتفصيل
 

فيديو عن دورة حياة المنتج 1

المنتج ليه عمر افتراضى و دورة حياة ممكن نشبهها بدورة حياتنا كا بنى آدمين بنمر بمراحل ( الطفولة و بعد كده الصبا و الشباب و بعدها النضخ و يليها الكهولة و الشيخوخة ثم فى نهاية المراحل الانهاء أو الموت )
المنتج كمان بيمر بمراحل مشابهة و  متقسمة لـ 4 مراحل و بعض المصادر بتقسمها لـ 5 أو أكتر لأن فى منهم بتجمع أكتر من مرحلتين مع بعض و هما :
1- الانطلاق أو التقديم introduction  
2- النمو Growth
3-النضج Maturity
4-التراجع أو الانحدار  Decline

 
أى منتج بيبدأ بفكرة و الفكرة دى بنحطها للبحث و التطوير عشان نعرف اذا كانت مربحة أو مجدية و لا و لما نتأكد من ده بتبدأ عملية الانتاج و بيتم طرح المنتج فى السوق للمستهلكين و دى المرحلة اللى نقدر نقول بتبقى قبل الـ introduction

 
فا المرحلة الأولى ( الانطلاق أو التقديم ) introduction  : بتبقى بداية تقديم المنتج فى السوق اللى بتعمله تعريف و awareness  بحملة تسويقية و بتستمر فى الاعلان عنه للمستهلكين المستهدفين و عرض لفوايده و مميزاته و المرحلة دى بتبقى مكلفة لأنها بتستهلك وقت و مجهود فى مرحلة مسبقة ليها فى البحث و التطوير و اختبار المنتج بالنسبة للمستهلكبالاضافة  لنفقات التسويق عشان تعرف بالمنتج و خصوصا لو كنت فى مجال فيه منافسة أو المعروف بالـ Red ocean و ده مصطلح للتعبير عن الدخول فى مجال شديد المنافسة و سوق متشبع بالأساس و ده هنتكلم عنه بشكل تفصيلى فى موضوع منفصل عشان تعرف ازاى ممكن المنتج بتاعك يكمل لو هو فى الـ stage  دى
فى المرحلة دى كمان بتبقى المبيعات قليلة فى البداية و ده المفروض مش هيستمر كتير لو فعلا المنتج بتاعك ليه احتياج كبير فى السوق و عند المستهلكين المستهدفين و لازم تبقى عارف بردو ان الناس بيحبوا يجربوا كل شىء جديد و ممكن فى البداية تلاقى الطلب عليه كبير و رغبة فى تجربته بس بعد كده كل ده بيقل و ده اللى هيختبر المنتج بتاعك اذا كان فعلا بيغطى need  مهمة عند المستهلك أو مميز فعلا عن غيره من المنتجات و لا،  و اذا اثبت نجاحه بيدخل بعدها لمرحلة النمو و اللى هى تانى مرحلة.
خطط للتغلب علي المرحلة الحالية:
1.    الاعلان عن ضمان استرداد الاموال في حالة الشراء لتشجيع العميل علي الشراء, وكسر خوفه من ضياع امواله.
2.    هدايا لجذب العملاء الجدد
3.    خصومات للتجار الجملة او متاجر اعادة التوزيع – تجار التجزئة او مسوقين بالعمولة
4.    اسعار مخفضة للشراء
5.    عمل نماذج صغيرة من المنتج للتجربة
6.    تسعير مختلف عن السوق ممكن يجذب العملاء للشراء – كميات مختلفة باسعار مختلفة
7.    تغليف نختلف عن السوق لارسال رسالة للعميل بانك مختلف او احسن
8.    توزيع اقرب للعميل – شحن مجاني واسترجاع مجاني
9.    خطط لعرض المنتج بشكل افضل كاظهار طرق التصنيع والتغليف والفروق بين المنافس – او عرض المميز في المنتج كالخامة او السعر

فيديو عن دورة حياة الملابس

فيديو عن دورة حياة الهواتف - المنتجات التقنية

المرحلة التانية ( النمو ) Growth : بتتميز المرحلة دى فى نمو كل شىء فى الأرباح و المبيعات و حجم الانتاج و ده بيحمس أصحاب المنتجات انهم يستثمروا مبالغ أكتر عشان يسوقوا و يروجوا للمنتج و يوصلوا لأعلى درجة فى مرحلة الـgrowth  و اللى بتحاول فيها تميز المنتج بتاعك بشكل أكبر و اللى بردو فيها بيزيد الطلب على المنتج و بالتالى بيزيد انتاجه و انتشاره و بتوافره فى الأسواق بشكل أكبر و بيكون بعدها وصل لمرحلة النضج
خطط للتغلب علي المرحلة الحالية:
1.    الاعلان بطرق جديدة ومبتكرة
2.    دفع الناس الى التجارب المجانية او استرداد المبالغ في حالة عدم الانتفاع المباشر بمنتجك او لم يكن علي المستوى المراد
3.    سرعة الوصول للعميل – التوصيل السريع والرد الاسرع عليه
4.    احجام جديدة واصدارات جديدة للعميل لتغطية احتياجات اكثر او عملاء جدد
5.    زرع طبعا العلامة داخل دماغ العميل – عن طريق الاعلانات والعروض والظهور امامه كثيرا بصورة معينة والتاكد من وصول العلامة كما تريد للعميل – الرسالة الخاصة بالبراند
6.    منافسة سعر المنتج المنافس – والبعد عنه قدر المستطاع كصناعة سوق مختلفة تماما او استهداف شريحة بعينها واخذها من المنافس – تقسيم السوق الى شرائح واستهداف كل شريحة علي حدا
7.    خدمة مابعد البيع من اهم مراحل النمو

المرحلة التالتة ( النضج ) Maturity :  بيبدأ المنتج فى مرحلة الاستقرار فى السوق و عند العملاء و القرار الصح فى المرحلة دى مش انك تطمن للوضع ده و تعتمد عليه لأن المرحلة دى مش هتفضل فيها على طول و من المهم انك تتصرف بحكمة فى كل خطوة سواء فى الاستثمار فى المنتج أو تفكر تعمل customize  لكل need عند المستهلك و تقسمه لشرائح أكتر ، و فى الوقت ده كمان مهم انك تحافظ على الميزة التنافسة للمنتج اللى بتديله حصة سوقية
كمان فى المرحلة دى بيظهر للمنتج منافسين أكتر و هنا انت بتحاول تحافظ على تواجد المنتج فى السوق فا بتحتاج تطور و تحسن فيه عشان يقدر يكمل فى المنافسة و تحافظ على معدل أرباحك اللى وصلتله لأن المرحلة اللى بعدها جاية جاية و كتير بيوصلولها بسرعة جدا  و هى مرحلة الانحدار أو التراجع
و اللى بيفرق المنتج فى مرحلة ( الانطلاق أو التقديم ) عن مرحلة ( النضج ) هى طريقة تسويقه لأن فى الأولى بيبقى التركيز على الشرح و التعريف أكتر بالمنتج و استعراض فوايده انما فى التانية بيبقى التركيز و الحاجة للتمييز عن باقى الأنواع اللى بتتشابهه فى القيمة اللى بيقدمها او الاحتياج اللى بيغطيه
ثيودور ليفيت Theodore levitt  أستاذ التسويق وضح فى مقال ليه سنة 1965 فى مجلة هارفارد بيزنس ريفيو Harvard business review ان من المساؤى اللى ممكن تقابل صاحب فكرة مشروع جديد أثناء ادارته لدورة حياة المنتج و خصوصا لو كان مبتكر انه بيكون عرضه للخسارة و ده لأن المنتجات دى بتفشل فى أول مراحلها بعد ما يستثمر الشخص فيها مبالغ ضخمة و استهلك وقت فى البحث و التطوير و كمان الانتاج من غير ما يجربها بشكل مبدئى و سريع على المستهلكين و يعرف مدى قبولها عندهم  و ممكن فى مروره بمرحلة النضج يتعرض منتجه بسهوله للاستنساخ و التقليد من بعض الأشخاص اللى بيستغلوا نجاح بعض المنتجات الجديدة و فى الوقت ده لازم تكون جاهز و مستعد للتطوير و التحديث فى المنتج بتاعك بشكل أفضل و فى اسرع وقت قبل دخوله للمرحلة الأخيرة و هى الضعف و التراجع نحو الانتهاء من السوق و المنافسة.
كف تعرف انك في هذه المرحلة وكيف تتعمق بها:
1.    وصول الرسالة الخاصة بالبراند للعميل
2.    التفاعل والاعلان عن منتجك بالطرق المجانية من العميل نفسه – كالترشيحات والنشر علي قنوات التواصل الاجتماعي من العملاء بسهولة
3.    خوض اسواق جديدة وشرائح جديدة – توسيع السوق
4.    تطوير المنتج – اصدار منتجات اخرى مكملة له او زيادة المميزات

 المرحلة الرابعة ( الانحدار و التراجع ) Decline
قبل المرحلة الأخيرة  بتظهر مرحلة مسبقة ليها بنسميها التشبع و ده بيحصل فى شكل  ملل عند العملاء و المستهلكين من المنتج بتاعك و بيبدءوا يدوروا على نوع مختلف و جديد عنه و ممكن أى منتج جديد يلفت نظرهم و يستحوذ على اهتمامهم فى المقابل  ، و ده اللى لازم تحضرله لما توصل للمرحلة دى عشان تحافظ على بقاء المنتج فى السوق اللى بيبدأ يفقد أهميته عند الناس و بيتراجع فى نجاحه
و بتضطر وقتها أنك تقلل السعر و بالتالى التكلفة لأن معدل الأرباح بيقل كتير عن المراحل اللى فاتت أو تعمل منتجات فرعية و تكميلية تحت المنتج الأساسى

و الأهم من انك تفهم مراحل دورة حياة المنتج انك تستخدم الموارد و الاستراتيجيات المناسبة سواء فى المبيعات و التسويق أو فى التحسين و التعديل على المنتج بشكل مستمر حسب المرحلة اللى بيمر بيها
و فى كل مرحلة بيبقى  ( شكل المنتج و استراتيجية تسعيره - تسويقة و ترويجه - توزيعه ) مختلفة فى تخطيطها و تنفيذها.
و من ضمن الاستراتيجيات اللى بتأخر وصولك للمرحلة الأخيرة ( الانحدار أو الضعف او انتهاء المنتج ) هى :
-الاعلان و الترويج اللى بيساعدك تجذب و تكسب عملاء جداد و تفكر العملاء الحاليين دايما بيك و تحفز عندهم الطلب و الاحتياج للمنتج اللى بتقدمه
-تقليل الأسعار و ده عشان تزود شريحة او قاعدة العملاء المستهدفين
-اضافة قيمة أو ميزة جديدة للمنتج الحالى زى انك تحسن مواصفاته أو جودة انتاجه أو تزود خواص جديدة فيه عشان مثلا تسهل استخدامه و تعيش المستهلك تجربة جديدة
-البحث و استكشاف أسواق جديدة : تستهدف فيها شرائح و قطاعات مختلفة أو تتيح المنتح و توفره فى مناطق جديدة
-تغيير الشكل النهائى للمنتج أو فى شكل التعبئة و التغليف  packaging
زى كتير من الـ Brands  اللى ظهرت و أخدت شهرة و انتشار و بعد كده منها اللى كمل فى نجاحه و استحواذه و منها اللى اختفى مع الوقت نتيجة لعدم قدرته على المنافسة أو مواكبة التغيير و التطور اللى حصل فى سوق المنافسة أو فى البيئة المحيطة بيه بشكل عام سواء تطور تكنولوجى أو تغيير اقتصادى و غيرها من أشكال التغيير و التطور.

لتحميل الملف بالصور اضغط هنا